குருக்கள்மடம் (மட்டக்களப்பு) பகுதியில் சந்தேகிக்கப்படும் கல்லறை இடத்தில் மேற்கொள்ளப்பட்ட அகழ்வுப் பணிகள் மனித உடல் எச்சங்கள் அல்லது பொருட்கள் எதுவும் கண்டுபிடிக்கப்படாமல் நிறைவடைந்துள்ளதாக காணாமல் போனவர்களுக்கான அலுவலகம் (OMP) 2026 ஏப்ரல் 3ஆம் தேதி வெளியிட்ட அறிக்கையில் தெரிவித்துள்ளது.
களுவாஞ்சிக்குடி நீதவான் டி. பிரதீபன் மேற்பார்வையில் மார்ச் 30ஆம் தேதி தொடங்கிய அகழ்வுப் பணிகள் மூன்று நாட்கள் நடைபெற்றன. அந்த இடத்தில் அடையாளம் காணப்பட்ட குறிப்பிட்ட பகுதி அகழப்பட்டபோதும் எந்த ஆதாரமும் கிடைக்கவில்லை எனவும் பின்னர் அந்த குழி மூடப்பட்டதாகவும் அதிகாரிகள் தெரிவித்தனர்.
மணற்பாங்கான நில அமைப்பும் நீர் இருப்பும் காரணமாக அகழ்வுப் பணிகள் தொழில்நுட்ப ரீதியாக சவாலாக இருந்ததாக கூறப்பட்டாலும், தொல்லியல் முறைகளின் அடிப்படையில் இடம் ஆய்வு செய்யப்பட்டது.
இந்த தொழில்நுட்ப குழுவில், கொழும்பு முதன்மை நீதிமருத்துவ அதிகாரியால் நியமிக்கப்பட்ட நீதிமருத்துவ மனிதவியல் நிபுணத்துவம் பெற்ற மருத்துவர்கள், தொல்லியல் துறை அதிகாரிகள், குற்றப்புலனாய்வு அதிகாரிகள் மற்றும் இலங்கை காவல்துறையினர் இணைந்திருந்தனர்.
மேலும் காணாமல் போனவர்களுக்கான அலுவலக அதிகாரிகள் அகழ்வைப் பார்வையிட்டதுடன், முறையீட்டாளர்களின் வழக்கறிஞர்களும் கலந்து கொண்டனர். முதல் நாளில் 50க்கும் மேற்பட்ட காணாமல் போனவர்களின் குடும்பத்தினர் கலந்து கொண்டதுடன், அடுத்த நாட்களிலும் பலர் அந்த இடத்துக்கு சென்றுள்ளனர்.
2016ஆம் ஆண்டின் காணாமல் போனவர்களுக்கான அலுவலகச் சட்டத்தின் கீழ், சந்தேகிக்கப்படும் கல்லறை இடங்களில் அகழ்வுப் பணிகளை மேற்கொள்ள நீதிமன்ற அனுமதி பெறும் அதிகாரத்தின் அடிப்படையில், 2025 ஆகஸ்ட் 25ஆம் தேதி முன்னாள் நீதவான் ஜே.பி.ஏ. ரஞ்சித் குமார் வழங்கிய நீதிமன்ற உத்தரவின்படி இந்த அகழ்வுப் பணிகள் மேற்கொள்ளப்பட்டன.
இந்த குருக்கள்மடம் இடம் முதன்முதலில் 2014ஆம் ஆண்டு கிடைத்த முறையீட்டின் அடிப்படையில் அடையாளம் காணப்பட்டது. 2015ஆம் ஆண்டு சாட்சியாளர் காட்டிய இடங்களில் தரை ஊடுருவிச் சோதனை (Ground Penetrating Radar) மேற்கொள்ளப்பட்டு, அதன் அடிப்படையிலேயே இம்முறை அகழ்வுப் பணிகள் நடைபெற்றன.
இந்நிலையில், அந்த இடத்தின் பிற பகுதிகளிலும் மேலும் விசாரணைகள் தொடரும் என காணாமல் போனவர்களுக்கான அலுவலகம் தெரிவித்துள்ளது.
