மட்டக்களப்பு மாவட்டத்தில் அண்மைக் காலங்களில் ஏற்பட்ட போர் அனர்த்தங்கள், சுனாமி அனர்த்தங்கள் போன்றவற்றால் உதைபந்தாட்ட விளையாட்டு சற்று பின்னடைவை அடைந்திருந்தாலும் இன்று மீண்டும் புத்துயிர் பெற்று வருவதை காண்கிறோம் என மட்டக்களப்பு மாவட்ட தமிழ் தேசிய கூட்டமைப்பு பாராளுமன்ற உறுப்பினர் பொன்.செல்வராசா தெரிவித்தார்.மட்டக்களப்பு நாவலடி ‘‘கோல்பிஸ்’’ விளையாட்டுக் கழகம் மாவட்ட ரீதியில் நடத்திய உதைபந்தாட்ட போட்டியில் பிரதம அதிதியாக கலந்து கொண்டு உரையாற்றும் போதே அவர் இவ்வாறு தெரிவித்தார்.
அவர் அங்கு தொடர்ந்து உரையாற்றுகையில்,
உதைபந்தாட்டம் மட்டுமல்ல கிரிக்கெட், கரப்பந்தாட்டம் போன்ற விளையாட்டுக்களிலும் இம் மாவட்டம் முன்னேறிக் கொண்டு வருவதை நாம் பாராட்டாமல் இருக்க முடியாது. இதற்கு இம்மாவட்டத்தில் பணி புரிகின்ற விளையாட்டுத் துறை அதிகாரிகள் பாராட்டுக்குரியவர்கள்.
இன்று மட்டக்களப்பின் கிழக்கு பகுதியில் மட்டுமல்லாமல் மேற்கு பகுதியிலும் இவ்வாறான விளையாட்டுக்களை மின்னொளியில் மாவட்டத்தின் வீரர்கள் விளையாடிக் கொண்டு வருவதை காண்கிறோம்.
விளையாட்டின் மூலம் ஓய்வு நேரத்தை இளைஞர்களும் யுவதிகளும் நன்றாக பயன்படுத்தக் கூடிய ஒரு துறை விளையாட்டாகும். அல்லாது விட்டால் சமூகச் சீர்கேடுகளில் இளைஞர்கள் பங்கு கொண்டு ஒரு கெட்ட சமூகத்தை ஏற்படுத்துவதற்கு வாய்ப்பாக இருக்கும். ஆகவே தான் நாம் இத்துறையை ஊக்குவிப்பதற்காக சில விளையாட்டு கழகங்களுக்கு நிதி உதவிகளை வழங்கி வருகின்றோம்.
அந்த வகையில் எம்மிடமிருந்து நிதி உதவி பெற்ற கழகங்களில் ஒன்றான நாவலடி கோல்பிஸ் விளையாட்டு கழகம் இன்று முதலாவது இடத்தினை பெற்றிருப்பதையிட்டு பெருமையடைகின்றேன்.
இன்று எமது நாட்டில் இளைஞர்களும் யுவதிகளும் 18 வயதிற்கு கீழ் திருமணம் செய்கின்ற விகிதாசாரம் 6 வீதமாக இருக்கிறது. அதேநேரத்தில் மட்டக்களப்பு மாவட்டம் இதில் 12 வீதமாக உள்ளது. இது எமக்கு கவலையை அளிக்கிறது. இது ஏன் என்பதையிட்டு நாங்கள் ஆராய வேண்டியவர்களாக இருக்கிறோம்.
இது வறுமையின் தாக்கமா? அல்லது கல்வியின் பின்னடைவா? என்பதை நாங்கள் அறிந்து கொள்ள வேண்டியதாக உள்ளது. இளம் வயது திருமணங்களில் ஆரோக்கியமான குழந்தைகளை பெற்றுக்கொள்ள முடியாது. அது மட்டுமல்லாமல் குடும்பத்தை நடத்தக் கூடிய கல்வி மற்றும் பொருளாதாரத்தை கூட இவர்களால் பெற்றுக்கொள்ள முடியாது. இதனால் எமது சமுதாயம் ஒரு சீரழிந்த சமுதாயமாக மாறக் கூடும் என்றார்.
