கல்முனை தமிழ் பிரதேச செயலகம் தரம் உயர்த்தப்படா விட்டால் பிரதேச செயலக கூரையின் மீது ஏறி சாகும் வரை உண்ணாவிரதத்தில் ஈடுபடுவேன் என கல்முனை சுபத்திரராம விகாரையின் விகாராதிபதி ரண்முத்து கலசங்க ரத்ன தேரர் தெரிவித்தார்.கல்முனை வாழ் தமிழ் மக்களின் நீண்ட காலக்கனவான கல்முனை தமிழ் பிரதேச செயலகம் தரம் உயர்த்துவது தொடர்பான சிவில் சமூகத்தினரின் கூட்டம் பிரதேச செயலகத்தில் அண்மையில் நடைபெற்றது. அதன் போதே அவர் மேற்கண்டவாறு கூறினார்.
இக்கூட்டத்தில் மட்டக்களப்பு மாவட்ட ஸ்ரீலங்கா சுதந்திரக்கட்சி அமைப்பாளரும் ஜனாதிபதியின் இணைப்பாளருமான அருண் தம்பிமுத்து அம்பாறை விகாராதிபதி சன்சீந்திரிய தேரர் உட்பட பல முக்கிய பிரமுகர்கள் கலந்து கொண்டனர்.
அவர் தொடர்ந்தும் குறிப்பிடுகையில்,
கல்முனை வாழ் தமிழ் மக்களின் அரசியல் உரிமைகளை பெற்றுக்கொடுப்பதில் நான் என்றைக்கும் முன்னணியிலேயே இருப்பேன்.
அந்த வகையில் கல்முனை வாழ் தமிழ் மக்களின் 25 வருடக் கனவான தமிழ் பிரதேச செயலகம் தரம் உயர்த்தப்படுவதற்கு என் உயிரையும் தியாகம் செய்ய தயாராகவுள்ளேன். அதனால் இப்பிரதேச செயலகம் மீது ஏறி சாகும்வரை உண்ணாவிரதம் இருக்கவும் தயங்கப் போவதில்லை. தமிழ் மக்கள் எனக்கு ஆதரவு தந்தால் உங்களுக்காக எதையும் செய்வேன்.
கடந்த 2004இல் ஏற்பட்ட சுனாமி அனர்த்தத்தின் போது அம்பாறைக்கு வந்த தமிழ் மக்களுக்கு பல உதவிகளைப் பெற்றுக்கொடுத்தேன். எனது சேவையினை பார்த்த தமிழ் மக்களே என்னை கல்முனைக்கு வரழைத்தார்கள் என்றும் கல்முனைக்கு மக்களுக்கு சேவை செய்து வருகின்றேன்.
நான் கூட்டங்களில் கலந்து கொண்டு தெரிவிக்கும் கருத்துக்களை சில ஊடகவியலாளர்கள் திரிவுபடுத்தி செய்திகளை வெளியிடுகின்றனர். அதனால் தமிழ் மக்கள் மத்தியில் என்னைப் பற்றி தப்பபிப்பிராயம் வளர்ந்துள்ளது. தயவு செய்து ஊடகவியலாளர்கள் உண்மைகளை வெளியிட வேண்டும்.
நான் ஜனாதிபதியின் இணைப்பாளராக இருந்திருந்தால் கல்முனை வாழ் தமிழ் மக்கள் இந்தளவிற்கு கஷ்டப்பட வேண்டி இருந்திருக்காது உங்களது பிரச்சினைகளை தீர்த்து வைத்திருப்பேன். கல்முனை தமிழ் பிரதேச செயலகம் தரம் உயர்த்துவது தொடர்பில் எனக்கு ஏதாவது பிரச்சினை எழுமாக இருந்தால் தமிழ் மக்கள் தான் என்னைக் காப்பாற்ற வேண்டும் என்றார்.
