(தஜிவரன், பிரகாஷ் ) கடந்த சில தினங்களுக்கு முன் வெளியாகிய க.பொ.த. உயர்தர பரீட்சை பெறுபேறுகளின்படி எமது மட்டக்களப்பு மாவட்டம் சார்பாக மாணவர்கள் பல சாதனைகளை மேற்கொண்டு வருவது குறிப்பிடத்தக்கது. அடிப்படை வசதிகள், பொருளாதாரம் போன்ற பல்வேறு குறைபாடுகளுக்கு மத்தியில் ஒரு மாணவனது சாதனைதான் இது!பேத்தாழை விபுலானந்த வித்தியாலயத்தில் முத்துவேல் ராசன் எனும் மாணவன் கலைப்பிரிவில் 2 ஏ, 1 சீ பெறுபேற்றினை பெற்று பாடசாலை சார்பாக முதலிடத்தினையும் மட்டக்களப்பு மாவட்டம் சார்பாக 29ஆவது நிலையினைப் பெற்று பல்கலைக்கழகத்திற்கு தெரிவாகியுள்ளார்.
வாகரை பிரதேச செயலாளர் பிரிவில் மாங்கேணி எனும் இடத்தை பிறப்பிடமாகக் கொண்ட இந்த மாணவன் தனது ஆரம்பக் கல்வியை 1 முதல் க.பொ.த. சாதாரண தரம்வரை மாங்கேணி புனித ரோமன் கத்தோலிக்க வித்தியாலயத்தில் கல்வி கற்றிருந்தார். இவர் கல்வி கற்கும் காலங்களில் தனது தந்தையை இழந்ததோடு பல்வேறு விதமான பொருளாதார நெருக்கடிகளை சந்தித்து தனது கல்வியை இடைநிறுத்தாமல் தொடர்ந்திருக்கிறார்..
இவருடைய தாயார் கடற்கரைக்குச் சென்று கரைவலையில் வரும் மீன்களைத் தெரிந்து கொடுத்து அதன் மூலம் வருகின்ற ஒரு சிறிய வருமானத்தில் தங்களது வாழ்வாதாரத்தை நடத்தி வந்துள்ளனர். இந்த காலங்களில் அந்தப் பணத்தை வைத்து வயிற்றுப் பசியைத் தீர்ப்பதா? அல்லது அறிவுப் பசியைத் தீர்ப்பதா என்ற கேள்விக்கு மத்தியில் இவரது கல்விப் பயணம் தொடர்ந்திருக்கிறது. அடிப்படை வசதிகளான உணவு, உடை, உறையுள், மின்சாரம் போன்ற விடயங்கள் கூட இல்லாத நிலையில் இவரது கல்வி தொடர்ந்திருக்கிறது. இத்தனை கஷ்டங்களுக்கு மத்தியில் க.பொ.த. சாதாரணதர பரீட்சையில் மாங்கேணி புனித ரோமன்கத்தோலிக்க பாடசாலையில், சாதாரண தரம் தொடங்கி இருபது வருடங்களின் பின் இந்த மாணவன் மாத்திரம் தான் அனைத்துப் பாடங்களிலும் சித்திபெற்று உயர்தரத்திற்கு தகுதியாகியுள்ளார்.
எவ்வளோவோ அபிவிருத்திகளை கடந்து போகின்ற இன்றைய சூழலில் இவளவு கஷ்டத்தின் மத்தியில் இப்படியான சாதனை என்பது பிரமிப்பான விடயம் தான் எங்களிடம் வளங்கள் இருக்கின்றன ஆனால் களங்கள் சரியாக அமைய வில்லை என்பதற்கு இவைகள் தான் எடுத்து காட்டுகள் இப்படிபட்ட இன்னலுக்கு மத்தியிலும் தன் நோக்கத்தில் தளராது சாதித்த மாணவன் ஒரு சிறந்த முன் உதாரணம்
