மத்திய அரசாங்கத்திற்குரிய நீர்ப்பாசன திணைக்களத்தில் நாடு பூராகவும் கடமையாற்றும் தொழிலாளர்களை நிரந்தரமாக்கும் நடவடிக்கையில் தமிழர்கள் புறக்கணிக்கப்பட்ட விடயம் தொடர்பாக நீர்ப்பாசன அமைச்சர் நிமல் ஸ்ரீபாலடி சில்வாவின் கவனத்திற்கு கொண்டு வரவுள்ளதாக தமிழ் தேசிய கூட்டமைப்பின் நாடாளுமன்ற உறுப்பினர் பொன்.செல்வராசா தெரிவித்தார். மேற்படி தொழிலாளர்களை நாடாளுமன்ற உறுப்பினர் பொன் செல்வராசா மட்டக்களப்பில் சந்தித்து கலந்துரையாடினார்.
'அண்மையில் மத்திய அரசாங்கத்திற்குரிய நீர்ப்பாசன திணைக்களத்தில் நாடு பூராகவும் 650 பேருக்கு நிரந்தர நியமனம் வழங்கப்பட்டது. இவர்களில் மட்டக்களப்பு மாவட்டத்திற்கு 14பேர் தெரிவு செய்யப்பட்டுள்ளனர். இவர்களில் ஒருவரைத் தவிர மற்றைய 13 பேரும் மட்டக்களப்பு அல்லாத வெளி மாவட்டங்களைச் சேர்ந்தவர்கள். அதில் பெரும்பாலானோர் பெரும்பான்மை இனத்தைச் சேர்ந்தவர்கள்.
இது இப்படி இருக்கும்போது மட்டக்களப்பு மாவட்டத்தில் மத்திய நீர்ப்பாசனத் திணைக்களங்களில் 67 தொழிலாளர்கள் சமயாசார ஊழியர்களாக பல வருடகாலமாக நிரந்தர நியமனம் இன்றி வேலை செய்துகொண்டிருக்கின்றனர்.
இவர்கள் யுத்த காலத்தில் கூட பல சிரமங்களுக்கும் மத்தியில் பல இடங்களுக்கும் சென்று வேலை செய்துள்ளனர். அதுமட்டுமல்லாது வெள்ள அனர்த்த காலங்களிலும் குளங்கள் உடைகின்ற சந்தர்ப்பங்கள் ஏற்படுகின்றபோதும் அங்கு சென்று 24 மணி நேரங்களும் தொடர்ந்து வேலை செய்துள்ளார்கள். இவர்களில் க.பொ.த சாதாரணம் மற்றும் உயர்தரத்தில் சித்தியடைந்தவர்களும் அடங்குகின்றனர்' என்றும் அவர் தெரிவித்தார்.
