தமிழ் மக்களுக்கு எதிராக இனப்படு கொலை இடம்பெற்ற காலத்தில் அதனை கண்டும் காணாமலும் அரசாங்கத்துடன் ஒட்டிக்கொண்டு இருந்தவர்கள்தான் முஸ்லிம் காங்கிரஸில் உள்ள அமைச்சர்களும் பாராளுமன்ற உறுப்பினர்களும் என கல்முனை மாநகர சபை எதிர்க்கட்சி தலைவர் அ. அமிர்தலிங்கம் கூறினார்.
முஸ்லிம்களுக்கு எதிராக இந்த நாட்டிலே அண்மைக்காலமாக இடம்பெறும் சம்பவங்கள் தொடர்பாக கண்டன தீர்மானம் ஒன்று கல்முனை மாநகர முதல்வரினால் முன்வைக்கப்பட்டது. இத்தீர்மானத்திற்கு ஆதரவளித்து பேசுகையிலேயே அவர் இவ்வாறு தெரிவித்தார்.
அவர் மேலும் கூறுகையில்,
1977, 83, 90 ஆம் ஆண்டு காலப்பகுதியில் தமிழ் மக்களுக்கு எதிராக இந்த நாட்டிலே மாறிமாறி ஆட்சிப்பீடம் ஏறிய இரண்டு அரசாங்கங்களும் செயற்பட்டன.
தமிழர்களின் சொத்தை சூறையாடியும் உ.ைடமைகளையும் நாசம் செய்தும் அவர்களை ஏதிலியாக்கியுதும் தான் இந்த இரண்டு அரசாங்கங்களும் தமிழ் மக்களுக்கு செய்த கைங்கரியமாகும். இந்த நேரத்தில் கூட முஸ்லிம் காங்கிரஸ் அந்த அரசாங்கங்களுடன்தான் ஒட்டிக்கொண்டு வேடிக்கை பார்த்துக் கொண்டு இருந்தது. அதுபற்றி அவர்கள் எங்காவது கதைத்ததும் இல்லை. அதனை எண்ணிப்பார்த்ததும் இல்லை.
ஆனால் பாதிக்கப்பட்ட சிறுபான்மை இனம் என்ற ரீதியில் நாங்கள் கைகட்டி வாய்மூடி மௌனிகளாக இருந்ததும் இல்லை. இனிமேல் இருக்கப்போவதுமில்லை. எங்களுக்கு ஏற்பட்ட வலி எங்களுக்கு நன்றாக புரியும். அந்த வலியினை இன்னுமொரு சிறுபான்மை இனம் பட வேண்டும் என்று நாங்கள் விரும்பமாட்டோம்.
1972ஆம் ஆண்டு புத்தளத்தில் உள்ள முஸ்லிம்கள் சுட்டுக்கொல்லப்பட்ட போது தமிழரசு கட்சியின் தலைவர் தந்தை செல்வா பாராளுமன்றத்திலே அதற்கு எதிராக குரல் கொடுத்தவர் என்பதை அனைவரும் அறிந்திருப்பார்கள்.அவ்வாறுதான் எமது கட்சி அன்றிலிருந்து இன்று வரைக்கும் செயற்பட்டுக்கொண்டு வருகின்றது. அதேபோன்றுதான் இனிவரும் காலங்களிலும் செயற்படும் என்பதில் எந்த சந்தேகமும் இல்லை.
கல்முனை மாநகர சபையைப் பொறுத்த வரையில் தமிழ், முஸ்லிம் ஆகிய இரண்டு சமூகங்களும் ஐக்கியமாக இருந்து செயற்பட வேண்டும். அதற்கு அனைவரும் ஒத்துழைக்க வேண்டும் எனவும் கேட்டுக்கொண்டார்.
