ஊர் மக்களுக்கு ஏற்பட்டுள்ள உணர்வு கல்விக்காக செயற்படும் தலைவர்களுக்கு ஏற்படாமல் போனது ஏன் ?? | Battinews.com - Sri Lanka Tamil News

ஊர் மக்களுக்கு ஏற்பட்டுள்ள உணர்வு  கல்விக்காக செயற்படும்  தலைவர்களுக்கு  ஏற்படாமல் போனது ஏன் ??  

  

கல்வி இல்லாத வாழ்வு வேண்டாம் என்ற நிலை காணப்படும் போது அதை அடைய முடியாமல் மட்டக்களப்பு மேற்கு கல்வி வலயத்தில் உள்ள  பாடசாலைகள்  பல குறைபாடுகள் மத்தியில் இயங்கிக்கொண்டு இருப்பதை எவரும் மறுக்க முடியாது . இருப்பினும் ஒரு சில பாடசாலைகள்  மிகவும் சிரமத்தின் மத்தியில் இயங்கிகொண்டு இருப்பதை அநேகர் அறியாமல் இருக்கின்றார்கள் . கல்வியில் ஒரு நல் நிலையை மட்டக்களப்பு மாவட்டம் அடைந்து வரும் நிலையில் சில பாடசாலைகள் அந்த நிலையை அடைய  முடியாமல்  தத்தளிக்கின்றது காரணம்  வளக்குறைபாடேயாகும் . வயிறு நிறைய சாப்பிட்டவனுக்கு இன்னும் உணவைக் கொடுத்தால் என்ன நடக்கும் அவன் வயிறு வெடிக்கும் அல்லவா ? எத்தனையோ உள்ளங்கள் பசியால் துடிக்கின்றார்கள் அவர்களை இனங்கண்டு உணவை கொடுக்கலாம் அல்லவா ? அதை விடுத்து அதிகாரிகள் யாருக்கெல்லாம் உணவு கொடுக்கிறார்கள் தெரியுமா ?

01. ஆசிரியர்கள் நிறைவாய் இருக்கும் பாடசாலைக்கு இன்னும் ஆசிரியர்கள் 

02. வகுப்பறை  நிறைவாய் உள்ள பாடசாலைக்கு இன்னும் வகுப்பறைகள்   

03. நூலகம் உள்ள பாடசாலைக்கு இன்னும் பெரிய நூலகம் 

04. கணணி அறை , கணணி வசதி உள்ள பாடசாலைக்கு இன்னும் கணணி அறை , கணணிகள்  

05.   கதிரை , மேசை நிறைவாய் உள்ள பாடசாலைக்கு இன்னும் கதிரை , மேசைகள்  

06. மைதானம் உள்ள பாடசாலைக்கு இன்னும் திருத்தப்பட்ட மைதானம் 

இப்படிப்போனால் கிராமப்புறங்களில் இருக்கும் பாடசாலைகளின் நிலை என்ன ? அங்கு உள்ள மாணவர்களின் நிலை என்ன ? கிராமப்புறங்களில் உள்ள மாணவர்கள்  செய்த தவறு என்ன ? இதற்கெல்லாம் பதில் சொல்வது யார் ?

இன்று நடப்பது என்னவெனில்  பசித்தால் சமைத்து சாப்பிடு என்று சமையலுக்குத்  தேவையான அரிசி , கறிவகைகளை ஓரளவு கொடுக்கின்றார்கள் ஆனால் இவைகளை இட்டு  சமைப்பதற்குத் தேவையான பாத்திரத்தை கொடுப்பது  இல்லை பாத்திரம் இல்லாமல் எங்கு இட்டு சமைப்பது ??   

கடந்த 26. 08. 2014 ( செவ்வாய்க்கிழமை  ) நடந்த சம்பவம் ஒன்று பெற்றோர் , பிள்ளைகள் கல்வியில் மேல் கொண்டுள்ள பற்றினை உலகிற்கே  பறை சாற்றி நிற்கின்றது .அந்த வகையில் மட்டக்களப்பு மேற்கு கல்வி வலயத்தில் உள்ள பன்குடாவெளி ரோமன் கத்தோலிக்க தமிழ் கலவன் பாடசாலையானது பல குறைபாடுகளோடு இயங்கிக் கொண்டு வருகின்றது . அதில் ஒன்றுதான் வகுப்பறைக்கட்டடம் ஆகும் .   அந்த வகையில் இங்குள்ள பெற்றோர் , மாணவர்கள் நல்லதொரு  கட்டடத்தை எதிர்பார்த்து எதிபார்த்து  களைத்துப் போனவர்களாக ஏதும் செய்ய முடியாது என்ற நிலையில் ,  இருக்கின்றதான பழைய கட்டடம் ஒன்றினை வரும் மழைகாலத்தில் மாணவர்கள் சிரமப்படாமல் படிக்க வேண்டும் என்பதற்காக  கிடைக்கப்பட்ட ஒரு சிறு தொகைப் பணத்தைக் கொண்டு தங்கள் குடும்பத்தேவைகளையும் பாராமல் பாடசாலையின் அதிபரின் தலைமையில் மாணவர்கள் , தாய்மார் , தகப்பன்மார் , மற்றும் ஆசிரியர்கள் திருத்த வேலைகளில்  ஈடு பட்டதைக் காணமுடிந்தது . கிராம மக்களுக்கு உண்டான உணர்வு பொறுப்பான அதிகாரிகளுக்கு இல்லாமல் போனதை நினைத்தால் வெட்கமாக உள்ளது .இவ்வாறு கற்றலில் அதிக நாட்டம் கொண்ட மக்களின்    ( மாணவர்களின் )  தேவையை நிறைவு செய்து கொடுப்பது யார் ?  

 என் . எஸ் . எஸ்