தனியாரால் 1750 ரூபாவுக்கு கொள்வனவு செய்யப்பட்டுவந்த நெல்மூடை ஒன்று தற்போது 3000 ரூபா வரை உயர்ந்துள்ளது. இம்முறை மழை பொழியாமையினால் இங்கினியாகல குளத்தின் நீர்க்கொள்ளளவு குறைந்தமையையடுத்து சிறுபோக வேளாண்மைச்செய்கை 50 வீதமாக குறைக்கப்பட்டிருந்தது காரணமாகும்.
குறைந்தளவு வயற்காணிகளில் நெற்செய்கை மேற்கொள்ளப்பட்டிருந்ததால் தற்போது அறுவடை செய்த கையோடு நெல்லை முண்டியடித்துகொண்டு களவட்டியிலேயே கொள்வனவு செய்வதைக் காணக்கூடியதாயுள்ளது. வெளியிலிருந்து வரும் வர்த்தகர்களே இவ்விதம் பெருமளவில் கொள்வனவு செய்கின்றனர்.
தனியாரால் 1750 ரூபாவுக்கு கொள்வனவு செய்யப்பட்ட நெல் மூடை ஒன்று தற்போது 3000 ரூபா வரை உயர்ந்துள்ளது.
இம்முறை பெரும்பாலான விவசாயிகள் அரச நெல்கொள்வனவிற்காக நெல்லை களஞ்சியங்களுக்கு வழங்கவில்லை. ஏனெனில் தனியாரிடம் நெல்லின் கொள்வனவு விலை அதிகமாக இருந்ததே காரணமாகும்.தற்சமயம் விவசாயிகளிடம் நெல் விற்பனைக்கு இல்லை என்ற நிலைதோன்றியுள்ளது.
இன்னும் பல விவசாயிகள் நெல்லின் விலை மேலும் உயர்வடையலாம் என்றெண்ணி பதுக்கிவைத்துள்ளனர். நாளுக்குநாள் நெல்லின்விலை உயர்வடைந்து வருவதே காரணமாகும். இன்னும் விலை உயர்வடையலாம் என எதிர்பார்க்கப்படுகிறது. இதேவேளை பெரும்போக நெற்செய்கை ஆரம்பமாகியிருப்பதால் விதைநெல்லுக்கும் மௌசு ஏற்பட்டுள்ளது. 1 மூடை விதை நெல் 3500 ரூபாவுக்கு விற்கப்படுகிறது.
விவசாயிகள் மகிழ்ச்சி
காரைதீவைச்சேர்ந்த மூத்த பெரும் விவசாயி இரா. திருநாவுக்கரசு தெரிவிக்கையில் வரலாற்றில் ஒரு மூடை நெல்லின் விலை 3000 ரூபாவுக்கு விற்றது இம்முறைதான். சில இடங்களில் 3300 ரூபா வரையும் சென்றிருக்கிறது.
விவசாய சமூகத்தை பொறுத்தவரை அது மிக்க மகிழ்ச்சி. இம்முறை நல்ல விளைச்சலும்தான். இறைவன் கண்ணைத் திறந்துள்ளான். அதனால் விவசாயிகள் மகிழ்ச்சியடைந்துள்ளனர்.எம்மைப்பொறுத்தவரை வெளியூரோ உள்ளூரோ எந்த வியாபாரி கூடுதல் விலையைத் தருகிறார்களோ அவர்களுக்கு நெல்லை வழங்குவோம். ஏனெனில் நாம் பாடுபட்டு வியர்வை சிந்தி கஷ்டப்பட்டு நெல்லை உற்பத்தி செய்பவர்கள்.எமது உற்பத்திக்கு எங்கு கூடுதல் விலையுள்ளதோ அங்கு வழங்குவோம்.
உள்ளூர் அரிசி ஆலை உரிமையாளர்கள் தமக்குள்ளே கலந்துரையாடி விவசாயிகள் நன்மையடையாவண்ணம் தமக்குள் விலையை வரையறுத்துக்கொண்டு தாம் மட்டும் இலாபமீட்டி செயற்பட்டுவந்தமை இம்முறை முறியடிக்கப்பட்டுள்ளமை வரவேற்புக்குரியது என்றார்.
