.jpg)
'தை பிறந்தால் வழிபிறக்கும்' என்பது பழமொழி பழமொழி பொய்த்தால் பழம்சோறு சுடும். எனவே தை பிறந்து விட்டது. (ஜனவரி) வழியும் பிறந்து விட்டது. மார்கழியில் மழை பெய்து ஏற்பட்ட வெள்ளத்தினால் அடைபட்ட வழிகள் தையில் மழை ஓய்ந்ததும் போக்குவரத்துக்கு ஏற்றதாகின்றன. இதுவே இப்பழமொழியின் உண்மையான கருத்து.
என்ன தான் மீன்கள் பாடியிருந்தாலும் பாலும் தேனும் பாய்ந்தோடியிருந்தாலும் மட்டக்களப்பு இயற்கை அனர்த்தங்கள் செல்லும் பிரதான வழியில் அமைந்து விட்டது. ஆன காரணத்தினால் வெள்ளம் சூறாவளி, சுனாமி என்று இயற்கையின் சீற்றத்துக்கு வருடாவருடம் (2013 தவிர) உற்பட்டு வருகின்றது. கிழக்கில் அம்பாறை திருகோணமலை மாவட்டங்களை விட மட்டக்களப்பு அதிகம் பாதிப்புக்கு உட்படுகின்றது.
மட்டக்களப்பு மாவட்டத்தின் சராசரி மழை வீழ்ச்சி 1651 மில்லி மீற்றர் ஆக இருக்கையில் இந்த வருடத்தில் 2507.8 மில்லி மீற்றர் மழை பதிவாகியிருக்கின்றது. நவம்பர் மாதத்தில் சாதாரண வெள்ளமும் டிசம்பரில் வரலாறு காணாத அளவு வெள்ளமும் ஏற்பட்டுள்ளது. நவம்பரில் 521.1 மில்லி மீற்றர் மழையும் டிசம்பரில் 1153.7 மில்லி மீற்றர் மழையும் பதிவாகியிருக்கின்றன. மட்டக்களப்பில் மட்டு.நகர் மயிரம்பாவெளி, பாசிக்குடா, கட்டுமுறிவு, உறுகாமம் , உன்னிச்சை, தும்பங்கேணி, நவகிரி ஆகிய இடங்களில் மழை வீழ்ச்சி பதிவு செய்யப்படுகின்றன. எனினும் நகரில் பெய்யும் மழை வீழ்ச்சியே அறிவிக்கப்படுகின்றது. ஆனால் நகரை விட ஏனைய இடங்களிலேயே மழை அதிகம் பெய்துள்ளது. இதனை கவனத்தில் கொண்டால் 2507.8 மில்லி மீற்றரை விட அதிக மழை பெய்திருக்கும் என்பது தெளிவு.
டிசம்பரில் வெள்ளம் ஏற்பட்ட தினங்களில் உறுகாமம் 136.5, தும்பங்கேணி 139.5 கட்டுமுறிவு 145.2 பாசிக்குடா 103.5, 117.5 என மட்டு.நகரை விட அதிக மழை வீழ்ச்சி பெறப்பட்டுள்ளது. இது எமது மேற்படி கருத்துக்கு சான்றாகும்
நாட்டிலுள்ள 24 மாவட்டங்களில் 22 மாவட்டங்கள் வெள்ளத்தினால் பாதிக்கப்பட்டதாகவும் அவற்றில் சுமார் 11 இலட்சம் பேர் பாதிப்புக்குள்ளானதாகவும் அனர்த்த முகாமைத்துவ மத்திய நிலையம் வெளியிட்ட தகவல்களை மேற்கோள் காட்டி ஊடகங்கள் செய்திகளை வெளியிட்டிருந்தன. இவர்களில் 106788 பேர் இடம் பெயர்ந்ததாகவும் அந்த தகவல்கள் தெரிவிக்கின்றன.
ஆனால் 164356 குடும்பங்களையும் அவற்றில் 583180 பேரை சனத்தொகையாகவும் கொண்ட மட்டக்களப்பு மாவட்டத்தில் 137000 பேருக்கு மேல் பாதிக்கப்பட்டனர். என்றும் சுமார் 12000குடும்பங்களைக் கொண்ட சுமார் 41000 பேர் இடம் பெயர்ந்தனர் என்றும் மாவட்ட அனர்த்த முகாமைத்துவ பிரிவு தகவல்கள் தெரிவிக்கின்றன. 54213 குடும்பங்களைச் சேர்ந்த 134144 பேரின் வாழ்வாதாரம் பாதிக்கப்பட்டிருக்கின்றது. மாவட்டத்தில் உள்ள 348 கிராம உத்தியோகத்தர் பிரிவுகளில் 341 பிரிவுகள் பாதிக்கப்பட்டுள்ளன. 22 மாவட்டங்களிலும் மட்டு. மாவட்டமே பாதிப்பில் முன்னணியாகவுள்ளது.இது மட்டக்களப்பு மாவட்ட சரித்திரத்தில் இவ்வளவு மோசமாக ஏற்பட்ட முதலாவது பாதிப்பாகும். இதற்கு மிக முக்கியமான காரணம் டிசம்பர் மாதத்தில் அதிகமான மழை வீழ்ச்சி ஏற்பட்டமையாகும். அதுமட்டுமன்றி டிசம்பர் மாதம் 19ஆம் திகதி தொடக்கம் 29ஆம் திகதி வரை 10 நாட்களுக்கு இடைவிடாது பலத்த மழை பெய்தமையும் மற்றொரு காரணமாகும். இவ்விதம் தொடர்ச்சியாக 10 நாட்களுக்கு பலத்த மழை பெய்ததும் இதுவே முதல் தடவையாகும்.
மட்டு. மாவட்டத்தில் வெள்ளப்பெருக்கு ஏற்படுவதற்கு பல காரணங்கள் இருக்கின்றன. பதுளை, அம்பாறை மற்றும் பொலன்னறுவை மாவட்டங்களில் பெய்யும் மழை நீர் மட்டக்களப்பு மாவட்டத்திற்கு வடிந்து செல்கின்றது. இந்த மாவட்டங்களில் உள்ள அண்டல் ஓயா, மாதுறு ஓயா மற்றும் நவகிரி குளங்களில் இருந்து வெளியேறும் நீர்இங்கு வெள்ளப்பெருக்கை ஏற்படுத்துகின்றது. அத்துடன் மேற்படி மூன்று மாவட்டங்களிலும் இருந்து பள்ளத்தாக்குகள் வழியாகவும் மேலதிக நீர் மட்டக்களப்பை சென்றடைகின்றது. மகாவலி கங்கை மாவட்டத்தின் வாகரை எல்லையில் அமைந்துள்ளமையால் அதன் பெருக்கெடுப்பு மட்டக்களப்பை பாதிக்கின்றது.
மட்டு. மாவட்டத்தில் மட்டக்களப்பு வாவி வாழைச்சேனை வாவி பனிச்சங்கேணி வாவி என்பன தவிர 14 ஆறுகள் இருக்கின்றன. உன்னிச்சை உறுகாமம் உட்பட 9 பாரிய குளங்களும் புழுகுநாவ, கடுக்காமுனை, கங்காணியார் அடைச்சகல் என 12 நடுத்தர குளங்களும் சுமார் 300 கிராமக் குளங்களும் அமைந்துள்ளன. இத்தனை நீரேந்து நிலைகளிலும் இருந்து பெருகி நீர் வெள்ளப்பெருக்கை ஏற்படுத்துகின்றன.
இவ்வாறு பெருகும் நீர் 5 வழிகளில் வங்காள விரிகுடாவைச் சென்றடைகின்றது. அமிர்தகழி முகத்துவாரம், கல்லாறு முகத்துவாரம், வாழைச்சேனை முகத்துவாரம், வாகரை முகத்துவாரம், மகாவலி கங்கை முகத்துவாரம்
வழிகளே அவை.
இவற்றில் மட்டக்களப்பு வாவி பிரதானமானது. இவ்வாவியின் ஆழமும் அகலமும் இப்போது குறைந்து விட்டன. ஆக்கிரமிப்பு காரணமாகவும் குப்பை கொட்ட இடமற்ற காரணத்தினாலும் கழிவுகள் வாவியில் வீசப்படுகின்றன. இதன் காரணமாக வாவியின் கொள்ளளவு குறைந்து வெள்ளம் ஏற்படுகின்றது. இந்த நடவடிக்கைகள் தடுக்கப்பட்டு வாவி மேலும் ஆழமாக்கப்பட வேண்டும்.
வீதிகள் யாவும் கொங்கிறீட் வீதிகளாக புனரமைக்கப்படுகின்றன. வீடுகள் அமைந்துள்ள நிலத்தை விட வீதிகள் உயரமாக அமைக்கப்படுவதுடன் வடிகான்கள் அமைக்கப்படுவதில்லை. இவற்றுக்கு மேலாக பொது மக்கள் சுற்றுமதிலையும் அமைத்து வருகின்றனர். இவற்றின் காரணமாக மழை நீர் வெளியேற வழியின்றி வெள்ளம் ஏற்படுகின்றது.
பெப்ரவரி மாதம் வரை நீடிக்கும். சில வருடங்களில் மார்ச் மாதத்திலும் வெள்ளம் ஏற்பட்டிருக்கின்றது. மழையும் வெள்ளமும் ஏற்பட்டது. அசாதாணரமான நிலை என்று சமாதானம் கூற முடியாது. இயற்கையின் சீற்றமாக இருப்பினும் ஏமாளியாக வந்த பின் தவிக்காமல் வருமுன் காக்க வேண்டும்.
ஏற்பட்ட வெள்ளம் பல கோடி ரூபா செலவில் புனரமைக்கப்பட்ட வீதிகளையே சூழ்ந்து போக்குவரத்தை பல நாட்களுக்கு ஸ்தம்பிக்கச் செய்து விட்டது. மண்டூர் - வெல்லாவெளி வீதி மண்டூர் - கல்முனை வீதி, பட்டிருப்பு வெல்லாவெளி வீதி, மட்டக்களப்பு - வலையிறவு வீதி, மட்டு - திருமலை நெடுஞ்சாலை, மட்டு. வாகரை - திருமலை நெடுஞ்சாலை ஆகிய முக்கியமான வீதிகளில் போக்குவரத்து தடைப்பட்டது. புகையிரத சேவை கூட 2 தடவைகள் ஸ்தம்பித்தன. இந்த பாதைகளில் வெள்ளம் பாய்ந்த இடங்கள் அடையாளம் காணப்பட்டு குழாய் பதித்தோ தாம் போதிகள் பாலங்களை அமைத்தோ வீதிகளை உயர்த்தியோ புனரமைக்க வேண்டும். அசாதாரணமான நிலைக்கு அப்பால் இந்த பாதைகளில் வருடா வருடம் போக்குவரத்து தடைப்படுவதை கவனத்தில் கொள்ள வேண்டும்.
நிவாரணம் என்பது சுற்று நிருபங்களுக்கு உட்பட்டது. யானைப் பசிக்கு சோளப் பொரிக்கு சமமானது. அரசாங்க ஊழியர்களுக்கு எந்த வகையிலும் பொருளாதாரப் பாதிப்பு இல்லை. மட்டக்களப்பில் 54 ஆயிரத்துக்கு மேற்பட்ட குடும்பங்களின் வாழ்வாதாரம் பாதிக்கப்பட்டுள்ளது. அன்றாட தொழிலுக்கு செல்ல முடியாத நிலை. மேட்டு நிலப்பயிர்கள் நாசமாகியுள்ளன. 3921 வீடுகள் முற்றாகவும் சுமார் 8 ஆயிரம் வீடுகள் பகுதியளவிலும் சேதமடைந்துள்ளன. எல்லாவற்றுக்கும் மேலாக சுமார் 80 ஆயிரத்துக்கு மேற்பட்ட பெரும் போக வேளாண்மை பாதிக்கப்பட்டுள்ளது. இதனால் ஏற்பட்ட நட்டத்தில் இருந்து மீள்வது என்பது விவசாயிகளால் முடியாத காரியம். பாதிக்கப்பட்ட மக்களுக்கு ஓரிருவாரம் சமைத்த உணவும் உலர் உணவும் ஏக்கருக்கு 2, 3 புல் விதை நெல்லும் கை கொடுக்குமா?
எனவே, இயற்கையின் சீற்றத்துக்கும் அசாதாரணமான நிலைக்கும் அப்பால் நீடித்து நிலைத்திருக்கும் அனர்த்த தடுப்பு அல்லது குறைப்பு நடவடிக்கைகளுக்கு அனைத்து தரப்பினரும் கைகோர்ப்பதே செய்யக் கூடியது.
