கிழக்கு மாகாண சபைக்கு சிறிலங்கா முஸ்லிம் காங்கிரஸ் சில தினங்களில் முதலமைச்சரை நியமிக்கும். எமது இந்த ஆட்சியுடன் தமிழ்த் தேசியக் கூட்டமைப்பும் இணைந்து வருமெனப் பெரு ஆர்வம் கொண்டுள்ளோம்.என நகர அபிவிருத்தி, நீர் வழங்கள் வடிகாலமைப்பு அமைச்சரும், சிறிலங்கா முஸ்லிம் காங்கிரஸ் தலைவருமான ரவூப் ஹக்கீம் தெரிவித்தார்.
கிழக்கு மாகாணசபைக்கான தேர்தல் நடைபெற்று ஆட்சியமையும் போது
ஐக்கிய மக்கள் சுதந்திர கூட்டமைப்புடன் முஸ்லிம் காங்கிரஸ் செய்து கொண்ட ஒப்பந்தம் தொடர்பில் ஜனாதிபதி மைத்திரிபால சிறிசேன மிக
உறுதியாகவுள்ளார்.
இதன்படி இன்னும் சில தினங்களில் முஸ்லிம் காங்கிரஸ் கிழக்கு மாகாணசபைக்கான புதிய முதலமைச்சரை நியமிக்கவுள்ளது.
அத்துடன் ஐக்கிய மக்கள் சுதந்திர கூட்டமைப்பு, ஐக்கிய தேசிய கட்சி முதலான கட்சிகளுக்கு அமைச்சர் பதவிகளும் வழங்கப்படவுள்ளன.
புதிய அரசின் நல்லாட்சிக்கான எடுத்துக்காட்டாக தேசிய அரசாங்கம் போன்ற கட்சிகளை இணைத்ததாக கிழக்கு மாகாணசபை ஆட்சியை அடுத்த இரண்டரை ஆண்டுகளுக்கும் முன்னெடுக்கவுள்ளோம்.
இதன் மூலம் தேசிய அரசாங்க ஆட்சியை முதலில் கிழக்கில் நிறுவிக்காட்டும் வாய்ப்பு எமக்கு கிடைத்துள்ளது.
இந்த நிலையில் தமிழ் தேசியக் கூட்டமைப்பும் எம்முடன் இணைந்து வரவேண்டுமெனப் பெரும் ஆர்வத்துடன் உள்ளோம்.
புதிய அரசியல் கலாசாரத்தை அறிமுகப்படுத்தும் ஆட்சியை கிழக்கில் அடுத்து வரும் இரண்டரை வருடங்களுக்கு மலரச் செய்வதில் தமிழ் தேசியக்கூட்டமைப்பும் பங்கு கொள்ளுமென்ற நம்பிக்கையுள்ளது என்றார்.
