1977 இல் இருந்து அரசியலில் நேரடியாகத் தன்னை ஈடுபடுத்திக் கொண்டவர். 1989, 1994 மற்றும் 2000 ஆண்டுப் பாராளுமன்றப் பொதுத் தேர்தல்களில் அம்பாறை மாவட்டத்தில் (திகாமடுல்ல தேர்தல் மாவட்டம்) போட்டியிட்டவர். தற்போது கலாநிதி எந்திரி கா.விக்கினேஸ்வரனின் தலைமையிலான அகில இலங்கை தமிழர் மகாசபை எனும் பதிவு செய்யப்பட்ட (2006) அரசியல் கட்சியின் செயலாளராகச் செயற்படுகிறார். எதிர்வரும் பொதுத் தேர்தலில் தமிழர் மகாசபை வடகிழக்கின் அம்பாறை (திகாமடுல்ல) தவிர்ந்த அனைத்து தேர்தல் மாவட்டங்களிலும் போட்டியிடுகிறது.
இது குறித்து அவரிடம் கேட்டோம்.
கேள்வி:: தமிழர் மகாசபை ஆரம்பிக்கப்பட்டதன் நோக்கம் என்ன?
பதில்: யார் பிழை? யார் சரி? எது சரி? எது பிழை? என்ற வாதப்பிரதிவாதங்களுக்கு அப்பால் கடந்த எழுபது வருடகால தமிழர்களுடைய உரிமைப்போராட்ட அரசியலும் அந்த அரசியல் பிரசவித்த கடந்த முப்பது வருடகால ஆயுதப் போராட்டமும் இலங்கையின் வடக்கு கிழக்குத் தமிழ் மக்களை சர்வதேசரீதியாகத் தனித் தேசிய இனமாக அடையாளப்படுத்தியதைத் தவிர - அதற்காக நாம் கொடுத்த விலை மிகமிக அதிகமானது. உள்நாட்டில் தமிழ் மக்களுக்கு வேறு எந்த சமூக, பொருளாதார நன்மைகளையும் பெற்றுத்தரவில்லை.
ஒரு சமூகத்தின் அரசியல்தலைமையின் அரசியல் செயற்பாடுகள் அது பிரதிநிதித்துவப்படுத்தும் சமூகத்தைச் சமூக பொருளாதார ரீதியாக மேம்பாடடையச் செய்வதாக அமைதல் வேண்டும். ஆனால் துரதிர்ஷ்டவசமாக தமிழர் அரசியலில் அதுநிகழவில்லை. கடந்த எழுபது வருடகால அரசியலில் தமிழர்கள் எய்திய அடைவுகள் குறித்த ஐந்தொகைக் கணக்கு ஒன்றினைக் காலம் கடந்தாயினும் பார்ப்பது தமிழ் மக்கள் எதிர்காலத்தில் செல்ல வேண்டிய அரசியற் திசையைத் தீர்மானிக்க உதவும். இவ்வாறான ஐந்தொகைக் கணக்கு ஒன்றின் நிகர இலாபம் என்னவெனில் வடக்கு கிழக்குத் தமிழர்கள் பட்டுவேட்டிக்குப் பாடுபட்டு இறுதியிலே இடுப்பிலே கட்டியிருந்த கோவணத்துண்டையும் இழந்த நிலைக்குத் தள்ளப்பட்டுள்ளனர். பிச்சை வேணாம் நாயைப்பிடி எனும்படியாக அரசியலில் பலவீனப்பட்டுளோம். எனவே, செயற்பாட்டுத்திறன் மிக்க தமிழ் அரசியல் சக்தியொன்றின் தேவை உணரப்பட்டதாலேயே தமிழர் மகாசபை தோற்றம் பெற்றது.கேள்வி: இன்றைய சூழலில் இவ்வாறான ஒரு கட்சி தேவைதானா?
பதில்: ஆம்! இப்போதுதான் கட்டாயம் தேவை. வடக்கு, கிழக்குத் தமிழர்களால் தேர்தல்களில் பெரும்பான்மையாக ஆதரிக்கப்பட்டு இன்று தமிழ் மக்களின் அரசியல் தலைமையாகக் கருதப்படும் தமிழ்த் தேசியக் கூட்டமைப்பு 2001 இல் உருவாக்கப்பட்டதாகும். 2004 பொதுத்தேர்தலில் 22 பாராளுமன்ற உறுப்பினர்களையும் பெற்றது. தமிழ்த் தேசியக் கூட்டமைப்பு உருவாகிப் 14 வருடங்கள் கழிந்துவிட்டன. இவர்கள் இதுவரை சாதித்தது என்ன? 2006ஆம் ஆண்டு ஆகஸ்ட் மாதம் திருகோணமலை மாவட்டத்தில் மாவிலாற்றில் ஆரம்பித்து 2009 மே 18 அன்று முல்லைத்தீவு மாவட்டத்தில் முள்ளிவாய்க்காலில் முடிவுக்கு வந்த விடுதலைப் புலிகளுக்கும் இலங்கை ஆயுதப்படைகளுக்கும் இடையிலான யுத்தப் பாதிப்புகளிலிருந்து அப்பாவித் தமிழர்களைக் காப்பாற்ற யுத்தம் உக்கிரமாக நடந்துகொண்டிருந்த காலத்தில் தமிழ்த் தேசியக் கூட்டமைப்பு எடுத்த காத்திரமான அரசியற் செயற்பாடுகள் - இராஜதந்திர நடவடிக்கைகள் என்ன? யுத்தம் உக்கிரமாக நடந்து கொண்டிருந்த போது தமிழ்த் தேசியக் கூட்டமைப்பின் தலைவர் இரா.சம்பந்தன் தனக்கும் யுத்தத்திற்கும் சம்பந்தம் இல்லை என்பதுபோல் இந்தியாவில் தங்கியிருந்தார். அப்போது பாராளுமன்றத்திலிருந்த 22 தமிழ்த் தேசியக் கூட்டமைப்புப் பாராளுமன்ற உறுப்பினர்களும் போர் நிறுத்தம் வேண்டிப் பாராளுமன்றப் படிக்கட்டுக்களில் அமர்ந்து சாகும்வரை உண்ணாவிரதம் இருந்திருக்கலாமே? அதுதானே உண்மையான அகிம்சைப் போராட்டம். போராடத்தானே இவர்கள் மக்களிடம் வாக்குக் கேட்டார்கள்.
விரிவஞ்சியும் நல்லெண்ணம் கருதியும் தமிழ்த் தேசியக் கூட்டமைப்பின் அரசியல் கையாலாகாத்தனங்களை நான் விபரிக்க இச்சந்தர்ப்பத்தில் விரும்பவில்லை. ஒட்டுமொத்தமாகச் சொல்லப்போனால் அரசியலில் மூன்றுவகையுண்டு. தனிநபருக்கான அரசியல் - Politics for the individual கட்சிக்கான அரசியல் Politics for the party, மற்றது மக்களுக்கான அரசியல் - Politics for the people, தமிழ்த் தேசியக் கூட்டமைப்பானது அதன் உருவாக்கக் காலத்திலிருந்தே ஒரு கட்சிக்கானதும் அக்கட்சியின் தனிநபர்களின் நலன் சார்ந்துமே செயற்பட்டுவருகின்றதே தவிர மக்களுக்கானதோர் அரசியலை அது முன்னெடுக்கவில்லை.
எனவே தேர்தலை மையப்படுத்தாது மக்களை மையப்படுத்தும் அரசியலை முன்னெடுக்கக் கூடியதும் - தெளிவான அரசியல் கோட்பாட்டுடன் அரசியலில் உகந்த அணுகுமுறையைக் கையாளக்கூடியதும் மக்களை அறிவுபூர்வமாக ஆற்றுப்படுத்தக் கூடியதும் - கண்ணியம் மிக்கதும், மக்களுக்கு விசுவாசமாகவும் நேர்மையாகவும் வெளிப்படையாகவும் செயற்படக்கூடியதும் - அரசியல் அனுபவம், ஆளுமை, ஆற்றல் மிக்கதும் - மக்களின் உணர்ச்சிகளைத் தூண்டிவிட்டு முரண்பாட்டு அரசியலைச் செய்யவிரும்பாததும் - தமிழ் மக்களிடையேயுள்ள கல்விமான்களையும் துறைசார், தொழில்சார் நிபுணர்களையும் சமூகப் பற்றுடைய தொழிலதிபர்கள் மற்றும் வர்த்தகர்களையும், கலை இலக்கிய சமூக மற்றும் ஊடகச் செயற்பாட்டாளர்களையும், அரசியலாளர்களையும் விவசாயிகளையும் தொழிலாளி களையும் உள்வாங்கியதும் - சமூக, பொருளாதாரரீதியாகத் தமிழ் மக்களைக் கைதூக்கிவிடக் கூடியதும் - ஒரேகுரலில் பேசக்கூடியதும் - தந்தை செல்வா காட்டிய வழியில் கட்டுப்பாட்டுடனும் ஐக்கியத்துடனும் செயற்படக்கூடியதுமான,
ஒரு மாற்று அரசியல் சக்தியைக் கட்டியெழுப்ப வேண்டிய தேவை காலங்கடந்தாயினும் இப்போதுதான் மிக மிக அவசியமானது.
கேள்வி: தமிழ்த் தேசியக் கூட்டமைப்புடன் நீங்கள் ஏன் சேர்ந்து இயங்க முடியாது?
பதில்: யதார்த்தபூர்வமான கேள்வி. தமிழ் மக்களின் ஐக்கியம் கருதியும் உட்சென்று தமிழ்த் தேசியக் கூட்டமைப்பின் தவறுகளைத் திருத்த முடியும் என்ற நம்பிக்கையிலும் எமது கட்சியின் தலைவர் கலாநிதி கா.விக்னேஸ்வரன் யுத்தம் முடிந்த பின் 2009–2010 காலப்பகுதியில் தமிழ்த் தேசியக் கூட்டமைப்பின் தலைவர் இரா.சம்பந்தனைச் சந்தித்து ஒரு பொது உடன்படிக்கையின் கீழ் எமது கட்சியான அகில இலங்கை தமிழர் மகாசபை (அக்காலகட்டத்தில் அகில இலங்கை தமிழர் கூட்டணி) தமிழ்த் தேசியக் கூட்டமைப்புடன் சேர்ந்து செயற்பட வேண்டுகோள் விடுத்தார். சம்பந்தன் அதற்கு மறுத்துவிட்டார்.
கேள்வி: எதிர்கால வேலைத்திட்டங்கள் என்ன?
பதில்: எமது கட்சியின் எதிர்கால வேலைத்திட்டங்களானவன.
முதலில் எமது கட்சி எண்ணம் கொண்டுள்ள உடனடி மற்றும் குறுகியகால வேலைத் திட்டங்களைப் பட்டியலிடுகின்றேன்.
யுத்தகாலத்தில் கணவன்மாரையும், உழைப்பாளி ஆண்மக்களையும் இழந்து அவதியுறும் பெண்கள் தலைமை தாங்கும் குடும்பங்களின் மறுவாழ்வுத் திட்டங்கள்.
பெற்றோர்களை இழந்த அநாதைப் பிள்ளைகளின் கல்வி வசதிகள் மற்றும் வாழ்வாதாரத்திற்கான தொழில் வாய்ப்பு வசதிகள்.
உழைக்கும் பிள்ளைகளை இழந்த வயோதிபப் பெற்றோருக்கான பராமரிப்புத் திட்டங்கள்.
இடம்பெயர்ந்து இன்னமும் மீளக்குடியமராத அகதிக் குடும்பங்களை மீண்டும் அவர்களது பழைய இடங்களில் குடியமர்வதை விரைவுபடுத்தல்.
மீள்குடியேறியும் இன்னும் பழைய இயல்பு வாழ்க்கைக்குத் திரும்பாத ஏழைக் குடும்பங்களை சமூக பொருளாதார ரீதியாக வலுப்படுத்தல்
வேலைவாய்ப்பற்றிருக்கும் இளம் யுவதிகள் மற்றும் இளைஞர்களுக்கு அரச, அரச சார்பற்ற , தனியார் நிறுவன மற்றும் சுயதொழில் வாய்ப்புக்களை ஏற்படுத்திக் கொடுத்தல்.
அவயவங்களை இழந்து உடல் ஊனமுற்றவர்களுக்கு வாழ்வாதார வசதிகளை ஏற்படுத்திக் கொடுக்கும் சமூகநல மேம்பாட்டுத் திட்டங்கள்.
யுத்தகாலத்தில் அழிக்கப்பட்ட கிராமியப் பொருளாதாரத்தை மீளக் கட்டியெழுப்புதல்.
தமிழ்ப் பிரதேசங்களில் நலிவுற்றிருக்கும் மீன்பிடி மற்றும் விவசாயத் தொழில்களை மேம்பாடடையச் செய்தல்.
பாரம்பரியக் குடிசைக் கைத்தொழில்களையும் மற்றும் ஏனைய சிறுகைத் தொழில்களையும் சிறுவர்த்தக முயற்சிகளையும் ஊக்குவிப்பதற்கான நிகழ்ச்சித் திட்டங்கள்.
அரசியல் கைதிகளின் விடுதலைக்கான துரித நடவடிக்கைகள்.
காணாமல் போனோர் சம்பந்தமாக மனிதாபிமான மற்றும் சட்ட நடவடிக்கைகள்.
வன்செயலால் பாதிப்புக்குள்ளானவர்களுக்கான பொருத்தமான நிவாரண மற்றும் நட்டஈட்டுக் கொடுப்பனவுத் திட்டங்கள் என்பவற்றை நடைமுறைப்படுத்துவோம்..
