மட்டக்களப்பு மேல் நீதிமன்றம் இருவருட கடூழிய சிறைத்தண்டனையும் தண்டமும் விதித்து தீர்ப்பு வழங்கியுள்ளது.
மட்டக்களப்பு மேல் நீதிமன்ற நீதிபதி சந்திரமணி விஸ்வலிங்கம் இத்தீர்ப்பினை வழங்கியுள்ளார்.
குற்றவாளிகளாக மேற்படி மூவருக்கும் விதிக்கப்பட்ட தலா இரு வருட கடூழிய சிறைத்தண்டனையில் கட்டாயமாக ஆறுமாத கால கடூழிய சிறைத்தண்டனையை அனுபவிக்க வேண்டுமெனவும், ஏனைய தலா 18 மாதங்களும் பத்து வருடங்கள் ஒத்திவைக்கப்பட்ட கடூழிய சிறைத்தண்டனையாகவும் நீதிபதி தீர்ப்பில் தெரிவித்தார்.
மட்டக்களப்பு பொலிஸ் நிலையத்தைச் சேர்ந்த பிரேமதிலக, ஜொஹான் ரூபசிங்க ஆகிய இரு பொலிஸ் கான்ஸ்டபிள்களுக்கும் லால் ஞானானந்த எனும் பொலிஸ் சாரதிக்கும் எதிராக திருட்டுக் குற்றம் சாட்டி சட்டமா அதிபரால் மட்டக்களப்பு மேல் நீதிமன்றத்தில் வழக்குத் தொடரப்பட்டிருந்தது.
பட்டிப்பளை கொக்கட்டிச்சோலைப்பிரதேசம் யுத்தக்காலத்தில் இராணுவ நடவடிக்கை மூலம் மீட்கப்பட்டதையடுத்து அங்கு பொலிஸ் நிலையம் ஒன்றை அமைப்பதற்கான ஆரம்ப நடவடிக்கைகளில் ஈடுபட்ட சமயமே குறித்த திருட்டுச் சம்பவம் இடம்பெற்றுள்ளது.
கொக்கட்டிச்சோலை பிரதேச செயலகத்தில் பொருத்தப்பட்டிருந்த குளிரூட்டி இயந்திரம் ஒன்றும் அதே பிரதேச செயலக சமுர்த்தி அலுவலகத்தில் பொருத்தப்பட்டிருந்த மூன்று மின்விசிறிகளும் திருடப்பட்ட சம்பவம் தொடர்பிலேயே குறித்த மூவர் மீதும் குற்றம் சுமத்தப்பட்டிருந்தது.
மேற்படி திருடப்பட்ட பொருட்கள் மட்டக்களப்பு பொலிஸ் நிலைய பொலிஸார் தங்கும் விடுதியில் மறைத்து வைக்கப்பட்டிருந்தமையும் கண்டுபிடிக்கப்பட்டது.
சம்பவம் தொடர்பில் வழக்கு விசாரணையின்போது குறித்த பிரதேச செயலாளர் மற்றும் சமுர்த்தி முகாமையாளர் ஆகியோர் சாட்சியமளித்ததுடன் கைவிரலடையாளங்களும் சமர்ப்பிக்கப்பட்டு ஆராயப்பட்டன. அத்துடன் பொலிஸ் சாட்சியமும் அளிக்கப்பட்டது.
மட்டக்களப்பு மேல் நீதிமன்றத்தின் மேல் நீதிமன்ற நீதிபதி சந்திரமணி விஸ்வலிங்கம் முன்னிலையில் குறித்த திருட்டுக் குற்றச்சாட்டு வழக்குவிசாரணை நடைபெற்றபோது சந்தேக நபர்களான மூன்று பொலிஸாரும் குற்றத்தை மறுத்து வந்தனர்.
எனினும் தண்டனைச் சட்டக்கோவையின் கீழ் குற்றஞ்சாட்டப்பட்டு தொடரப்பட்ட இந்த வழக்கு விசாரணையின் சாட்சியங்களின்படி சந்தேகமில்லாமல் குறித்த மூவர் மீதான திருட்டுக் குற்றம் நிரூபிக்கப்பட்டது.
இதனையடுத்துக் கடந்த வியாழக்கிழமை மேல் நீதிமன்ற நீதிபதி சந்திரமணி விஸ்வலிங்கம் தீர்ப்பு வழங்கினார்.
நாற்பது பக்கங்களைக் கொண்ட தீர்ப்பை வாசித்த நீதிபதி சந்திரமணி விஸ்வலிங்கம் மூன்று பொலிஸாரையும் குற்றவாளிகளாகக் கண்டு தீர்ப்பளித்தார்.
இதன்படி மூவருக்கும் தலா இருவருட கடூழிய சிறைத்தண்டனையும் தலா பத்தாயிரம் ரூபா தண்டமும் விதிக்கப்பட்டது.
அத்துடன் இருவருட சிறைத் தண்டனையில் கட்டாயம் ஆறுமாத கடூழிய சிறைத்தண்டனையை அனுப விக்க வேண்டுமெனவும் ஏனைய தலா 18 மாதங்களும் பத்து வருடங்கள் ஒத்திவைக்கப்பட்ட கடூழியசிறைத் தண்டனையாகவும் நீதிபதி தீர்ப்பில் தெரிவித்தார்.
தண்டம் செலுத்தத் தவறினால் தலாமூன்று மாதங்கள் சாதாரண சிறைத் தண்டனை அனுபவிக்க வேண்டுமெனவும் தீர்ப்பில் மேலும் தெரிவிக்கப்பட்டது.
