(மட்டக்களப்பு சிஹாறா லத்தீப்)
வாகரை பிரதேச செயலாளர் பிரிவின் தட்டுமுனைக் கிராம சேவகர் பிரிவின் விநாயகர் ஆலயத்திற்கென லண்டன் மேல்மருவத்தூர் ஆதி பராசக்தி மன்ற கரோ கிளையினரின் நிதிப் பங்களிப்புடன் புதிய மடப்பள்ளி மண்டபமும், ஆலய பொதுக்கிணறும் இன்று(06) மட்டக்களப்பு மாவட்ட அரசாங்க அதிபர் திருமதி.கலாமதி பத்மராஜாவினால் திறந்து வைக்கப்பட்டது. மேல்மருவத்தூர் ஆதி பராசக்தி மன்ற கரோ கிளையினரின் நிதிப் பங்களிப்புடன் மன்றத்தின் உறுப்பனர்களான ஜீவமணி மற்றும் கதிரவேலு துரைராஜா ஆகியோர் தலைமையில் இந்நிகழ்வினை ஏற்பாடு செய்திருந்தனர். இவ்வைபவத்தின்போது முதியோர்களுக்கானஆடைகள் , நீண்ட தூரம் கால் நடையாக பாடசாலை செல்லும் மாணவருக்கு துவிச்சக்கர வண்டி மற்றும் தென்னை, தேசி போன்ற மரக்கன்றுகளும் அப்பிரதேச மக்களுக்கு இலவசமாக வழங்கி வைக்கப்பட்டதுடன் வறியமாணவர்களுக்கு கல்விஊக்குவிப்பு உதவித்தொகைகளும் வழங்கிவைக்கப்பட்டன.
இந்நிகழ்வில் பிரதம அதிதியாகக் கலந்து கொண்டு உரையாற்றிய மாவட்ட அரசாங்க அதிபர் கலாமதி பத்மராஜா சிறுவர்களுக்கு வெறுமனே பாடசாலைக் கல்வியை மாத்திரம் போதிக்காது ஆன்மீகத்துடன் கூடிய கல்வியையும் புகட்டி சமுதாயத்தில் ஓர் முழுமை பெற்ற மனிதர்களாக உருவாக்குவதற்கு ஆன்மீகக்கல்வி மிகவும் அத்தியாவசிமானதாகும். சக்தி வழிபாடானது ஆதி காலம் தொட்டு எம்மவர் மத்தியில் பிரபல்யம் பெற்ற ஓர் வழிபாடாகும். இதனையும் சிறப்பாக கடைப்பிடித்து எமது சமுகம் மத்தியிலே நல்லொழுக்கம் கொண்ட ஆரோக்கியமானதோர் சமுகத்தைக் கட்டியெழுப்புவதற்கு அனைவரும் வழிகாட்டிகளாக அமைய முன்வரவேண்டுமெனவும் கேட்டுக் கொண்டார்.
மேலும் அவர் கருத்துத் தெரிவிக்கையில் பழமை வாய்ந்த இக்கிராமத்தில் எல்லாவகையான வழங்களும் நிறைந்து காணப்படுகின்றபோதிலும் வறுமை என்றவிடயமானது மாவட்டத்திலே வாகரைப் பிரதேசத்தில் தான் முதலிடத்தில் இருப்பதையிட்டு நான் கவலையடைகின்றேன். சுறுசுறுப்பான ஆரோக்கியமான மனிதர்கள் வாழும் இப்பிரதேசத்தில் சகலரும் முன்வந்து கைகோர்த்து இவ்வறுமை ஒழிப்பில் ஈடுபட முன்வரவேண்டுமெனவும் கேட்டுக் கொண்டார்.
இந்நிகழ்வின்போது வறுமைக்கோட்டின்கீழ் வாழும் மாணவர்களுக்கான உதவித் தொகைகளும், பாடசாலை உபகரணங்களும் வழங்கி வைக்கப்பட்டதுடன் மேல்மருவத்தூர் ஆதிபராசக்தி அமைப்பின் ஆண்டறிக்கையும் அவர்களின் மேல்மருவத்தூர் பங்காரு அடிகளின் வாழ்க்கை வரலாறு அடங்கிய நூலும் அதிதிகளுக்கு வழங்கி வைக்கப்பட்டது.
அத்தோடு அரசாங்க அதிபர் கலாமதி பத்மராஜா, வாகரை பிரதேச செயலாளர் எஸ்.ஹரன், மற்றும் கிழக்குப் பல்கலைக்கழக பொருளியல் துறை சிரேஸ்ட விரிவுரையாளர் சரோஜினி மகேஸ்வரன் ஆகியோருக்கும் பொன்னாடை போர்த்தியும் சந்தனமாலை அணிவித்து இவர்களின் மக்கள் சேவைகள் மற்றும் கல்விச்சேவையும் பாராட்டி கௌரவிக்கப்பட்டது.
இந்நிகழ்வில் வாகரைப் பிரதேச செயலாளர் எஸ்.கரன், கிழக்குப் பல்களைக்கழக்ததின் பொறுளியல் துறை விரிவுரையாளர் சரோஜினி மகேஸ்வரன், வாகரைப் பிரதேச சபையின் ஊரியன் கட்டு உறுப்பினர் ஆர்.ஜினேந்திரன், கலாசார உத்தியோகத்தர், கிராம சேவை உத்தியோகத்தர்கள் மற்றும் பொதுமக்கள், பாடசாலைமாணவர்கள், சிறார்கள் என பலரும் கலந்து சிறப்பித்தனர்.
