ருவான்வெலிசாய மற்றும் ஜய ஸ்ரீ மகா போதி உள்ளிட்ட புனித வழிபாட்டுத் தலப் பகுதிகளில் இருந்து வெளியேறுமாறு நீதிமன்றம் உத்தரவிட்டுள்ள போதிலும், தேரர்கள் உள்ளிட்ட குழுவினரால் ஆரம்பிக்கப்பட்ட சத்தியாக்கிரகப் போராட்டம் இன்று திங்கட்கிழமையும் (09) மூன்றாவது நாளாக தொடர்ச்சியாக முன்னெடுக்கப்பட்டு வருகின்றது.
அநுராதபுரம் புனித நகரத் திட்டத்துக்கு எதிர்ப்புத் தெரிவித்து பலாங்கொடை கஸ்ஸப தேரர் உள்ளிட்ட தேரர்கள் மற்றும் பொதுமக்கள் இணைந்து இந்த சத்தியாக்கிரகப் போராட்டத்தை சனிக்கிழமை (07) காலை அநுராதபுரம் ருவான்வெலிசாயவுக்கு அருகிலுள்ள தானசாலை வளாகத்தில் ஆரம்பித்தனர்.
இதன்போது, போராட்டத்தில் ஈடுபட்டவர்கள் குறித்த இடத்தில் தற்காலிக கூடாரமொன்றை அமைக்க முற்பட்டதால் அப்பகுதியில் அமைதியற்ற சூழ்நிலையும் ஏற்பட்டது.
இது தொடர்பில் அநுராதபுரம் தலைமையகப் பொலிஸ் பொறுப்பதிகாரி அநுராதபுரம் நீதவான் நீதிமன்றத்துக்கு விடயங்களை அறிக்கையிட்டதைத் தொடர்ந்து, ருவான்வெலிசாய மற்றும் ஜய ஸ்ரீ மகா போதி உள்ளிட்ட புனித வழிபாட்டுத் தலப் பகுதிகளில் இருந்து வெளியேறுமாறு சத்தியாக்கிரகப் போராட்டத்தில் ஈடுபட்டுள்ளவர்களுக்கு நீதிமன்றம் உத்தரவு பிறப்பித்தது.
எனினும், நீதிமன்ற உத்தரவைப் பொருட்படுத்தாது தேரர்கள் உள்ளிட்ட போராட்டத்தில் ஈடுபட்டுள்ளவர்கள் தொடர்ந்து குறித்த இடத்திலேயே தங்கியிருந்து போராட்டத்தை முன்னெடுத்து வருகின்றனர்.
இதேவேளை, நேற்று ஞாயிற்றுக்கிழமை (08) இரவு பலாங்கொடை கஸ்ஸப தேரரிடம் வாக்குமூலமொன்றைப் பதிவு செய்வதற்காக அநுராதபுரம் பொலிஸ் பிரிவின் குற்றப் புலனாய்வுப் பிரிவு அதிகாரிகள் குறித்த போராட்ட இடத்துக்கு சென்றிருந்தமை குறிப்பிடத்தக்கது.
.jpg)
