புதன்கிழமை பிரித்தானிய விமான நிலையங்களிலிருந்து புறப்படவிருந்த மற்றும் அங்கு வந்தடையவிருந்த குறைந்தது 177 விமானங்கள் இரத்துச் செய்யப்பட்டுள்ளதாக Flightradar24 தெரிவித்துள்ளது. அவற்றில் பெரும்பாலானவை லண்டன் ஹீத்ரோ விமான நிலையத்துடன் தொடர்புடையவையாகும். செவ்வாய்க்கிழமை இரவு 8 மணிவரை ஆயிரத்திற்கும் அதிகமான விமானங்கள் இரத்துச் செய்யப்பட்டிருந்தன.
விமானப் போக்குவரத்துக் கட்டுப்பாட்டுச் சேவை வழங்குநரான Nats நிறுவனத்தின் தொழில்நுட்பக் கோளாறே இந்தப் பாதிப்புக்குக் காரணமாகும். கடந்த மூன்று ஆண்டுகளில் பிரித்தானியாவில் ஏற்பட்ட மூன்றாவது பெரிய விமானப் போக்குவரத்துத் தடையாக இது பதிவாகியுள்ளது.
செவ்வாய்க்கிழமை பிற்பகல் ஒரு மணியளவில் ஆரம்பமான இந்தக் கோளாறு ஹீத்ரோ, கேட்விக், மான்செஸ்டர் மற்றும் ஸ்டான்ஸ்டெட் உள்ளிட்ட பிரித்தானியாவின் முக்கிய விமான நிலையங்களில் புறப்படும் விமானங்களைப் பாதித்தது.
சுமார் நான்கு மணித்தியாலங்களின் பின்னர் விமானத் தகவல்களைச் செயலாக்கும் அமைப்பிலிருந்த கோளாறு சரிசெய்யப்பட்டதாக Nats அறிவித்தது. எனினும், அந்நேரத்தில் புறப்படத் திட்டமிடப்பட்டிருந்த பெரும்பாலான விமானங்கள் புறப்படாமல் இருந்தன. தெற்கு இங்கிலாந்தை நோக்கி வந்த விமானங்களும் இதனால் பாதிக்கப்பட்டன.
செவ்வாய்க்கிழமை மாலை முழுவதும் விமானத் தாமதங்களும் இரத்துச் செய்யப்படுதலும் தொடர்ந்தன. குறைந்தது புதன்கிழமை வரையிலும் சேவைகள் பாதிக்கப்படும் என British Airways தெரிவித்துள்ளது. பாதிக்கப்பட்ட பயணிகள் வெள்ளிக்கிழமை வரை கட்டணமின்றி தமது பயணங்களை மாற்றிக்கொள்ளவும் அனுமதிக்கப்பட்டுள்ளனர்.
Ryanair நிறுவனத்தின் 65,000க்கும் அதிகமான பயணிகள் தாமதங்களை எதிர்கொண்டதுடன், அதன் 50 விமானங்கள் இரத்துச் செய்யப்பட்டன. இந்தக் கோளாறின் தொடர் விளைவுகள் ஐரோப்பா முழுவதும் விமானச் சேவைகளைப் பாதித்ததாக easyJet தெரிவித்துள்ளது.
லண்டன் விமான நிலையங்களுடன் மான்செஸ்டர் மற்றும் பர்மிங்காம் விமான நிலையங்களும் பெரிதும் பாதிக்கப்பட்டன. எடின்பர்க் மற்றும் பெல்பாஸ்ட் உள்ளிட்ட ஏனைய பிரித்தானிய விமான நிலையங்களின் சேவைகளிலும் இடையூறுகள் ஏற்பட்டன.
செவ்வாய்க்கிழமை இரவு விமானப் புறப்பாடுகள் மீண்டும் ஆரம்பிக்கப்பட்ட போதிலும், அந்த இரவு முழுவதும் வருகை தரும் விமானங்கள் இடைநிறுத்தப்பட்டதாக ஹீத்ரோ விமான நிலையம் தெரிவித்தது.
இந்தக் கோளாறு 2023 மற்றும் 2025ஆம் ஆண்டுகளில் பெரும் விமானப் போக்குவரத்துப் பாதிப்புகளை ஏற்படுத்திய சம்பவங்களிலிருந்து வேறுபட்டது என Nats தெரிவித்துள்ளது.
இந்தச் சம்பவத்திற்கு முழுப் பொறுப்பையும் ஏற்பதாக Nats நிறுவனத்தின் தலைமை நிர்வாக அதிகாரி மார்ட்டின் ரோல்ஃப் தெரிவித்தார். இருப்பினும், விமானப் போக்குவரத்து அமைப்பில் ஏற்பட்டுள்ள பெரும் நெருக்கடியை முழுமையாகச் சீர்செய்ய கால அவகாசம் தேவைப்படும் என்றும் அவர் கூறினார்.
இதற்கிடையில், Nats நிறுவனத்தின் நிர்வாகத்தில் மாற்றம் செய்யப்பட வேண்டும் என விமான நிறுவனங்கள் மீண்டும் வலியுறுத்தியுள்ளன. அதன் தலைமை நிர்வாக அதிகாரி பதவி விலக வேண்டும் என Ryanair கோரிக்கை விடுத்துள்ளதுடன், தற்போதைய நிலையில் Nats தனது பணியைச் செய்யத் தகுதியற்றதாக இருப்பதாக Wizz Air குற்றஞ்சாட்டியுள்ளது.
.jpg)
.webp)
